2 Timothy 1
1ខ្ញុំប៉ូលជាសាវករបស់ព្រះគ្រិស្ដយេស៊ូតាមបំណងរបស់ព្រះជាម្ចាស់ស្របទៅតាមសេចក្ដីសន្យាឲ្យបានជីវិតនៅក្នុងព្រះគ្រិស្ដយេស៊ូ 2ជូនចំពោះធីម៉ូថេជាកូនជាទីស្រលាញ់។ សូមឲ្យព្រះជាម្ចាស់ជាព្រះវរបិតានិងព្រះគ្រិស្ដយេស៊ូជាព្រះអម្ចាស់របស់យើងប្រទានព្រះគុណសេចក្ដីមេត្តាករុណានិងសេចក្ដីសុខសាន្តដល់អ្នក។ 3ខ្ញុំអរព្រះគុណព្រះជាម្ចាស់ដែលខ្ញុំបម្រើដោយមនសិការបរិសុទ្ធដូចជាពួកបុព្វបុរសរបស់ខ្ញុំដែរខ្ញុំតែងតែនឹកចាំពីអ្នកជានិច្ចនៅក្នុងសេចក្ដីអធិស្ឋានរបស់ខ្ញុំទាំងយប់ទាំងថ្ងៃ 4គឺនឹកចាំពីទឹកភ្នែករបស់អ្នកហើយចង់ជួបអ្នកខ្លាំងណាស់ដើម្បីឲ្យខ្ញុំពេញដោយអំណរ។ 5ខ្ញុំនឹកចាំពីជំនឿដ៏ឥតពុតត្បុតដែលមាននៅក្នុងអ្នកដែលមុនដំបូងជំនឿនោះស្ថិតនៅក្នុងឡូអ៊ីសជាជីដូនរបស់អ្នកបន្ទាប់មកនៅក្នុងអ៊ើនីសជាម្ដាយរបស់អ្នកហើយខ្ញុំជឿជាក់ថាជំនឿនោះក៏នៅក្នុងអ្នកដែរ។ 6ហេតុនេះហើយខ្ញុំរំឮកអ្នកថាចូរធ្វើឲ្យអំណោយទានរបស់ព្រះជាម្ចាស់ដែលមាននៅក្នុងអ្នកតាមរយៈការដាក់ដៃរបស់ខ្ញុំឲ្យមានសកម្មភាពឡើងវិញ។ 7ដ្បិតព្រះជាម្ចាស់មិនបានប្រទានឲ្យយើងមានវិញ្ញាណដែលភ័យខ្លាចទេផ្ទុយទៅវិញជាវិញ្ញាណដែលមានកម្លាំងសេចក្ដីស្រលាញ់និងគំនិតនឹងធឹង។ 8ដូច្នេះមិនត្រូវខ្មាស់ដោយសារទីបន្ទាល់អំពីព្រះអម្ចាស់របស់យើងឬដោយសារខ្ញុំជាអ្នកទោសដោយព្រោះព្រះអង្គនោះឡើយផ្ទុយទៅវិញចូររួមទុក្ខលំបាកជាមួយខ្ញុំសម្រាប់ដំណឹងល្អដោយអំណាចរបស់ព្រះជាម្ចាស់ 9ដែលព្រះអង្គបានសង្គ្រោះយើងហើយបានត្រាស់ហៅយើងដោយការត្រាស់ហៅដ៏បរិសុទ្ធមិនមែនដោយការប្រព្រឹត្តរបស់យើងទេគឺដោយគោលបំណងនិងព្រះគុណរបស់ព្រះអង្គដែលបានប្រទានឲ្យយើងក្នុងព្រះគ្រិស្ដយេស៊ូតាំងពីមុនអស់កល្បជានិច្ចម៉្លេះ 10ហើយឥឡូវនេះព្រះគុណនោះបានបង្ហាញឲ្យឃើញតាមរយៈការយាងមករបស់ព្រះគ្រិស្ដយេស៊ូជាព្រះអង្គសង្គ្រោះរបស់យើងដែលបានបំផ្លាញសេចក្ដីស្លាប់ហើយបានបំភ្លឺអំពីជីវិតនិងសេចក្ដីដែលមិនចេះស្លាប់តាមរយៈដំណឹងល្អ 11ហើយសម្រាប់ដំណឹងល្អនេះព្រះអង្គបានតែងតាំងខ្ញុំជាអ្នកប្រកាសជាសាវកហើយជាគ្រូផង 12ហេតុនេះហើយបានជាខ្ញុំរងទុក្ខលំបាកទាំងអស់នេះប៉ុន្តែខ្ញុំមិនខ្មាស់ឡើយដ្បិតខ្ញុំស្គាល់ព្រះដែលខ្ញុំជឿហើយខ្ញុំជឿជាក់ថាព្រះអង្គអាចរក្សាអ្វីៗដែលព្រះអង្គផ្ញើទុកនឹងខ្ញុំបានរហូតដល់ថ្ងៃនោះ។ 13ចូរកាន់តាមពាក្យត្រឹមត្រូវទាំងឡាយដែលអ្នកបានឮពីខ្ញុំទុកជាគំរូដោយជំនឿនិងសេចក្ដីស្រលាញ់ដែលមាននៅក្នុងព្រះគ្រិស្ដយេស៊ូចុះ។ 14ចំពោះសេចក្ដីល្អដែលបានផ្ញើទុកនឹងអ្នកចូររក្សាដោយព្រះវិញ្ញាណបរិសុទ្ធដែលគង់នៅក្នុងយើង។ 15អ្នកដឹងការនេះស្រាប់ថាពួកអ្នកដែលនៅស្រុកអាស៊ីទាំងអស់បានបែរចេញពីខ្ញុំហើយក្នុងចំណោមពួកគេមានលោកភីកេឡុសនិងលោកហ៊ើម៉ូនគេន។ 16សូមព្រះអម្ចាស់ប្រទានសេចក្ដីមេត្តាករុណាដល់ក្រុមគ្រួសាររបស់លោកអូនេស៊ិភ័រដ្បិតគាត់ធ្វើឲ្យខ្ញុំធូរស្រាលជាញឹកញាប់ហើយក៏មិនខ្មាស់ដោយសារចំណងរបស់ខ្ញុំដែរ 17សូម្បីតែនៅពេលគាត់មកក្រុងរ៉ូមគាត់បានព្យាយាមស្វែងរកខ្ញុំរហូតទាល់តែបានជួប។ 18សូមព្រះអម្ចាស់ប្រទានឲ្យគាត់ទទួលបានសេចក្ដីមេត្តាករុណាពីព្រះអម្ចាស់នៅថ្ងៃនោះហើយកាលនៅក្រុងអេភេសូរអ្នកក៏ដឹងច្បាស់ជាងគេដែរថាគាត់បានបម្រើច្រើនយ៉ាងណា។
Copyright information for
KhmKCB